कॅनडाच्या टेक इन्फ्लुएंसरला धक्का; महिंद्रा थारच्या किमतीइतकी सिक्युरिटी डिपॉझिट
बेंगळुरू – भारताच्या ‘सिलिकॉन व्हॅली’मध्ये घर शोधणं म्हणजे आता केवळ पैशांचा खेळ झाला आहे. कॅनडाचे टेक इन्फ्लुएंसर कॅलेब फ्रिसन यांनी सोशल मीडियावर शेअर केलेल्या अनुभवाने पुन्हा एकदा या शहरातील भाड्याच्या विलक्षण किमतींकडे सर्वांचं लक्ष वेधलं आहे.
काय घडलं ते समजून घेऊया. फ्रिसन साहेब गेली आठ वर्षं भारतात राहतात. त्यांना बेंगळुरूतल्या डोमलूर भागातील डायमंड डिस्ट्रिक्टमध्ये एक ३ बीएचके फ्लॅट आवडला. मासिक भाडं होतं १.७५ लाख रुपये. पण जेव्हा सिक्युरिटी डिपॉझिटचा आकडा समोर आला तेव्हा त्यांचेच नाही, सगळ्यांचेच डोळे विस्फारले – तब्बल १९.२५ लाख रुपये!
“अरे, या पैशात तर मी एक नवीकोरी महिंद्रा थार घेऊ शकतो!” असं म्हणत फ्रिसनने X वर (पूर्वीचं ट्विटर) आपली व्यथा मांडली. “आजकाल घरमालक काय अपेक्षा करतात हे पूर्णपणे वेडेपणाचं आहे. इंदिरानगर किंवा आसपासच्या भागात कुणाला २-३ महिन्यांच्या डिपॉझिटमध्ये घर माहीत असेल तर कळवा. माझं बजेट ८० हजार ते १ लाखापर्यंत आहे,” असं त्यांनी विचारलं.
नेटकऱ्यांची धमाल
या पोस्टला प्रचंड प्रतिसाद मिळाला. एकाने तर असं लिहिलं, “भाऊ, या पैशात कोलकाता किंवा दुसऱ्या टियर-२ शहरात तुम्ही नवं घरच विकत घेऊ शकता!”
